Songtext: "Hallo, Helvetia"

(zur Melodie von Steve Goodmans "City of New
                                 Orleans")

I stiige ii ine Cisalpino.
I hoff, dass dä nid uf ds Mal entgleist.
Wiu, dass die Cheibe pannenaafällig si,
isch öppis, wo me scho siit Jahre weiss.
Doch d'Bahnfahrt i ds Tessin wird guet.
I fasse wider früsche Muet.
I chönnt no bis uf Domodossola.
Doch über d'Gränz gilt ds GA nid,
aber usmache tuets mir nüt.
I find Souvenirs ou in Ascona.

         Hey, hallo, Helvetia. Wie geits dir?
         Säg, kennsch mi nümm? I bi lang nümm hie gsi.
         I bi hie geboren und ufgwachse.
         Drum ziehts mi immer wider zu dir hi.

Mit dr BLS gäg ds Oberland zue,
ds Thun usstige und denn dert uf ds Schiff,
d'Schwän und d'Aente uf em See aaluege
und am Ufer d'Lüüt, wo si bekifft.
RBS vo Bärn uf Solothurn,
öb bi Sunneschiin oder bi Sturm,
mit em öV, da chumen i
überall a, ganz egal wohi.

         Hey, hallo, Helvetia. Wie geits dir?
         Säg, kennsch mi nümm? I bi lang nümm hie gsi.
         I bi hie geboren und ufgwachse.
         Drum ziehts mi immer wider zu dir hi.

I hock uf mim Platz im Lumpesammler,
em letschte Zug ir Nacht gäge hei.
I lueg all die Nachtschwärmer a,
ha grad e Schock fürs Läbe gha.
Zum Glück geits nümm lang und i bi deheim.
Dert dänk i über ds Läbe na,
öb i witer so läbe cha
oder öppis anders mache muess.
I läbe gärn i üser Schwiiz,
aber i gloub, i gange jetz
und schicke ar Helvetia e Gruess.

         Hey, hallo, Helvetia. Wie geits dir?
         Säg, kennsch mi nümm? I bi lang nümm hie gsi.
         I bi hie geboren und ufgwachse.
         Drum ziehts mi immer wider zu dir hi.

         Drum ziehts mi immer wider zu dir hi.