Dialektsongtext: "Nei, i ga i kei Partei"

Wiu i scho ha Lieder gschribe mit politischem Inhalt,
hei sie ou scho bi mir gchlopfet, und de frage sie mi halt,
öb i ne nid wöll biträte, wiu das doch i mim Sinn sei,
aber i säg immer ds Gliche, i säg immer wider Nei.

       Nei, i ga i kei Partei!
       Nei, i ga i kei Partei!
       I blib i mim Dänke frei.
       Nei, i ga i kei Partei!

Bi us dr Chirche usträte us genau de gliche Gründ.
Warum söll de alls, was Spass macht, geng verbunde si mit
                                       Sünd?
Öb dr Pfarrer, öb dr Blocher, beid verzelle rächt viel Stuss,
und das, was sie so verzelle, bringt die Wält scho gnüegend
                                       druus.

       Nei, i ga i kei Partei!
       Nei, i ga i kei Partei!
       I blib i mim Dänke frei.
       Nei, i ga i kei Partei!

I weiss, wie'n i wott abstimme, wenn's um öppis Wichtigs geit.
I lies ds Material düre, konzentriert und überleit,
luege, dass es niemrem schadet, schriiben i mis Chrüzli hi.
Aber dass i so cha handle, muess i unabhängig si.

       Nei, i ga i kei Partei!
       Nei, i ga i kei Partei!
       I blib i mim Dänke frei.
       Nei, i ga i kei Partei!

       Nei, i ga i kei Partei!