Dialekt-Songtext: "Wieder mal passen i niene hi"

Früecher han i gschaffet uf em Bou,
und gchrampfet und aapackt han i ou,
bis mir mal es Frömdwort isch entschlüpft.
Da si all Kollege grad verchlüpft.
              Wieder mal passen i niene hi,
               wiu i für e Bou z'gebildet bi.

I bi i besseri Gsellschaft cho,
hett mit offnen Arme mi aagno,
bis ig, wie's im Läbe mängisch geit,
luutstarch einisch "Schiisdräck" ha gseit.
                Wieder mal passen i niene hi,
                 wiu i z'vulgär für d'Oberschicht bi.

I red wie dr Schnabel gwachsen isch,
egal i welem Job, a welem Tisch.
Verbiege lah mi vo dr Gsellschaft nümm.
I bi wien i bi, das isch nid schlimm.
                  I passe sowieso niene hi,
                  aber Houptsach, i ha Spass drby.

                  I passe sowieso niene hi,
                  aber Houptsach, i ha Spass drby.